“Maqedonia është viktimë e bullizmit klasik në procesin e integrimit evropian, sepse në vend të një sistemi meritor, vendi i nënshtrohet bilateralizimit të procesit të pranimit”, tha kryeministri Hristijan Mickoski në fjalimin e tij në konferencën kushtuar të ardhmes evropiane të Ballkanit Perëndimor, të organizuar nga Unioni Pan-Evropian i Maqedonisë. Sipas tij, Maqedonia është ndoshta i vetmi rast në Evropë ku progresi nuk vlerësohet sipas kapërcimit të sfidave të reformave, por bazohet ekskluzivisht në çështje bilaterale, gjë që, siç thotë ai, minon besueshmërinë e Unionit, diçka për të cilën ai ka marrë konfirmim nga gjithnjë e më shumë politikanë në Bruksel, transmeton Portalb.mk.

“Maqedonia është viktimë e ngacmimit klasik nga shtetet anëtare që po e shantazhojnë integrimin e saj në BE nga brenda. Dhe kjo nuk vlerësohet sipas progresit që kemi, por sipas faktit nëse do ta ndryshojmë Kushtetutën, emrin, flamurin, kartëmonedhat e kështu me radhë”, tha ai.

Mickoski paralajmëroi se në qarqet politike në Bruksel po flitet gjithnjë e më shumë për një iniciativë për të ashtuquajturat shtete anëtare të ligës së parë dhe të dytë, pra konceptin e integrimit gradual, dhe pikërisht për këtë arsye është e nevojshme të mendojmë si rajon se cilët do të jenë hapat e ardhshëm, sepse është e nevojshme të jemi të vetëdijshëm për të gjitha sfidat me të cilat do të përballen vendet e rajonit në vitet e ardhshme.

Në fjalimin e tij, kryeministri kritikoi ashpër grupet e mëparshme politike të udhëhequra nga LSDM, duke i akuzuar ata se pranonin gjithçka që u ofrohej nga jashtë për shkak të paaftësisë së tyre për të dhënë rezultate të brendshme dhe për t’u përballur me korrupsionin.

“Ata u drejtuan të udhëhiqeshin nga maksima: ‘na jepni një fletë të bardhë letre për të nënshkruar gjithçka që na duhet, vetëm mos na lini pa pushtet’. LSDM-ja dikur shtetformuese sot duket si një grup i vogël që merret me lajme të rreme dhe konferenca shtypi tabloide, të cilat nuk kanë të bëjnë fare me realitetin”, tha kryeministri.

Lidhur me mosmarrëveshjet me fqinjët, Mickoski është i bindur se nuk do të ketë negociata për çështje nga Mesjeta, por për vlerat evropiane dhe sundimin e ligjit.

“Në vend që të shikojmë drejt së ardhmes, ne po kthehemi në shekujt e dhjetë dhe të njëmbëdhjetë, duke interpretuar se kush ishin mësuesit e asaj kohe. Nuk ka askush gjallë nga Mesjeta që të na tregojë se si ishte. Por ky popull ka traditën, kulturën dhe trashëgiminë e vet shekullore. Ai gjithmonë e ka mbrojtur derën e Evropës, nuk është gjunjëzuar kurrë dhe vendi i tij është në Evropë”, përfundoi ai.

Kujtojmë se, lidhur me anëtarësimin në BE, kryeministri Hristijan Mickoski duket se ka ndryshuar qëndrim: nga një person që nuk pranonte ndryshime kushtetuese pa garanci të qarta, në një që tashmë shprehet më lehtësisht se ato janë të domosdoshme. Në një paraqitje në TV Kanal 5, ai tha se ekziston një mundësi që Maqedonia e Veriut të bëhet pjesë e bllokut, por pa të drejtë vote, gjë që do të ndodhte në vitin 2027, si pjesë e një skenari që lidhet me planin e paqes për Ukrainën. Deklarata e kryeministrit vjen një ditë pasi presidenti serb Aleksandar Vuçiq tha se pajtohet që Serbia të bëhet pjesë e BE-së pa të drejtë vote.

Kur u pyet nëse kushtet përfshijnë ndryshime kushtetuese, ai tha se “supozon se do të jetë kështu, sepse kjo u miratua nga qeveria e mëparshme”.

Deklaratat e tilla përbëjnë ndryshim drastik të qëndrimit të kryeministrit. Jo më larg se më 5 shkurt, kryeministri Hristijan Mickoski në RTVM tha se qëndrimi i Qeverisë për ndryshimet kushtetuese mbetet i pandryshuar dhe ato nuk do të ndodhin pa garanci të qarta se procesi i integrimit evropian nuk do të shoqërohet me bllokada dhe kushte të reja dypalëshe.

Maqedonia e Veriut mbetet e ngujuar në rrugëtimin drejt BE-së, shkaku i kontestit me Bullgarinë fqinje. RMV duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë. Ndryshimi kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime.

Me kusht të ndryshimi të Kushtetutës, Maqedonia e Veriut më 19 korrik të vitit 2022 i filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022. Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.

Ndërkohë, qëndrimi i Qeverisë për ndryshimet kushtetuese mbetet i pandryshuar dhe ato nuk do të ndodhin pa garanci të qarta se procesi i integrimit evropian nuk do të shoqërohet me bllokada dhe kushte të reja dypalëshe.